PCDVD數位科技討論區 - 蔣為文的公開信---台語文範本

引用:

感嘆一個台灣作家良心e死--抗議黃春明演講e頭尾kap公開聲明

蔣為文/成大台文系

2011.5.25

文訊雜誌社kap趨勢教育基金會等單位tī 2011年5月24號tiam台南e國立台灣文學館舉辦百年小說研討會。大會邀請作家黃春明先生做專題演講，題目是「台語文書寫與教育的商榷」。頭起先看著宣傳e時，iau koh teh質疑大會敢有hut m̄-tio̍h，黃春明並m̄是台語文專家，因何會請伊講這个題目？想袂到伊有影來台語作家大本營e台南，而且就是講這个題目。

雖bong進前就有流傳伊對台語文教育有chiaⁿ負面e意見，m̄-koh iah是抱著好奇、想beh進一步了解e心態報名出席這个研討會。想袂到伊e演講真正充滿偏見、扭曲事實e內容。伊一開始就以充滿負面e「閩南語」、「方言」來稱呼台語，koh以「中國人」來自稱。他the̍h台灣過端午節做例，表示台灣中國是同文同種，無應該ko͘-chhui一peng一國。其實，越南hām韓國mā有端午節，kam講越南kap韓國long ai變成中國？關係台語教育，伊tī演講tang中坦白家己看無國小台語文課本。伊無檢討家己是台語青瞑牛，soah怪罪台語課，認為本土語言課會增加學生e負擔。請問，若是美國總統Obama無去讀冊，伊敢會曉讀寫英文？平常時會曉講台語，若是m̄學，當然就看無台語文！M̄-nā an-ne，伊koh批評台語kan-taⁿ有口語，無書面語。其實，tī黃春明iau袂出世e 1885年，就已經有用台語羅馬字書寫e《台灣府城教會報》報紙出現，這个報紙刊行袂chio e台語白話小說。甚至，1926年鄭溪泮mā出版長篇台語小說《出死線》。借問--chi̍t-e，黃春明kam知影？主辦單位kam知影？台灣百年小說研討會為siaⁿ-mih thiau-kang漏kau台灣母語小說！？

演講到大約40分鐘e時陣，黃春明lu講lu激動，koh直接點名批判台語文前輩鄭良偉教授kap洪惟仁教授，而且批評台語文書寫是「不倫不類」。這時，m̄-nā是我，只要是有良心、有血性e台灣人攏會tong袂tiau！自an-ne，阮tī原底e座位kā海報gia̍h koan tiām-tiām抗議。海報分別是用台語kap華語書寫：「Tai-oan chok-ka ai iōng Tai-oan-gi chhong-chok!」、「台灣作家不用台灣語文，卻用中國語創作，可恥！」以及「用殖民者的語言華語創作才須商榷！」。阮無搶黃春明e mai-khuh，mā無阻礙伊發言。M̄-koh伊soah siak mai-khuh，衝tui我這peng來，na-chun beh拍我e款。Siang-si kui个穿紅衫e工作人員mā chiⁿ oa來beh搶阮 e海報koh kā阮趕。

我心內感覺hiau疑：為siaⁿ-mi̍h伊ē-sai點名侮辱別人，soah無法度容允別人對伊e恬靜抗議？所以我tō發言kā 伊抗議，質疑伊憑siaⁿ-mih批評台語文運動者追求母語文學kap教育e phah-piaⁿ！

抗議大約十分鐘了後，阮kā海報收起來，hō͘黃春明繼續演講。想袂到，伊iau是na講na罵。所以我koh一擺\gia̍h海報抗議！伊soah歹喙，用北京話罵「操你媽的B」而且比中指kā阮侮辱。自an-ne阮toh退席抗議！

原本這个研討會tī網路有全程e實況轉播kap錄影，想袂到會後這場錄影soah tui網站頂頭提掉。而且，網站頂頭黃春明e專題演講題目mā hong改做「請讀一頁小說」。我m̄ 知影負責執行e文訊雜誌社kap趨勢教育基金會kam是teh am-kham siaⁿ-mih無ai hō͘人知e祕密？

本人tī chia慎重呼籲kap要求：

第一：文訊雜誌社kap趨勢教育基金會ai解釋為siaⁿ-mih改講題，mā ai公布當天e錄影資料thang-ho chhoē-chhut真相，poe清網路頂面對本人無實在e謠傳kap指控！

第二：黃春明ai就「不倫不類」等侮辱台語文e言語，公開向鄭良偉教授、洪惟仁教授以及所有台語文作家kap工作者hoē失禮！

第三：假使黃春明認為台文界對伊有誤解，歡迎kap本人蔣為文公開辯論，接受社會大眾e評議！

http://www.twl.ncku.edu.tw/talk.php?page=1